KORONADAL CITY, COTABATO -- Dead on arrival sa ospital ang mag-asawang biktima ng pamamaril alas-syete ng gabi ng Huwebes sa bahagi ng Public Market, Poblacion, Matalam, Cotabato.

Sa interbyu ng ABS-CBN kay PLt. Warren James Caang, spokesperson ng Cotabato Police Provincial Office, kinilala ang mga biktimang sina alias "Lalaine" at alias "Eliser", kapwa residente ng Brgy. Manubuan, Matalam, Cotabato.

"Iyon na nga nakakalungkot na balita ang nangyari kagabi kung saan nagkaroon ng shooting incident, as a result sa carnapping kagabi sa Poblacion mismo ng Matalam kung saan ang biktima ay isang teacher at ang kaniyang asawa na dalawang buwang buntis," sabi niya.

"Sa ngayon po meron na po silang [pulisya] person's of interest na hindi pa natin puwedeng ilabas ang kanilang pagkakilanlan dahil ginagawa pa iyong malalimang imbestigasyon ng ating Matalam Municipal Police Station", wika ni Caang.

Lumabas sa inisyal na imbestigasyon ng mga pulis, isasara na sana ng mga biktima ang kanilang negosyo nang lapitan ng hindi pa nakikilalang salarin at saka pinagbabaril.

Matapos ang insidente, kinuha ng salarin ang motorsiklo ng mga biktima, at agad na tumakas patungo sa direksyon ng bayan ng Matalam.

Agad na ikinasa ng pulisya ang isang hot pursuit operation habang tinitingnan pa kung may mga CCTV sa lugar para maka tulong sa pagtukoy sa mga suspek.