MAYNILA -- Walang itinira kundi mga sirang puno, wasak na mga bahay at bangka si super typhoon Pepito nang hagupitin nito ang Bgy. Banocboc, Calaguas Island Linggo alas-dos ng madaling araw, Nobyembre 17, 2024.

Ayon kay Bayan Patroller Jomar Perillo, hindi pa sila nakakaahon sa nakaraang bagyong Enteng noong Setyembre 2024 ay winasak na muli ni super typhoon Pepito ang kanilang isla.

Sa mga larawan at video na ibinahagi ni Patroller ay makikita ang nagkalat na mga sanga at nabuwal na mga puno sa paligid. Wasak rin at halos walang natirang nakatayo sa mga bahay at bangka na pangkabuhayan.

Sa abiso ng kanilang barangay ay lumikas ang pamilya ni Bayan Patroller Jomar kahapon, Nov. 16 dahil nasa tabing dagat lang ang kanilang mga tirahan. 

Nitong umaga lang sila bumalik sa kanilang lugar at labis ang kanilang pagkalugmok sa  naabutan.