MAYNILA — Malapit na umanong maabot ang target na 3-milyong bagong botante sa bansa, ayon sa Comelec.

Puspusan na rin ang paghahanda ng Comelec dito dahil isang taon mula ngayon, o sa Mayo 12, 2025 ay gaganapin ang mid-term elections sa bansa.

"Kaunting-kaunti na lang, 3 milyon na 'yung mga pumupunta sa registration sites. Syempre pag pumupunta sa registration sites hindi lang naga-apply kung hindi 'yung iba nagpapa-reactivate dahil dating registered voters," ani Comelec Chairman George Erwin Garcia.

Sakaling maabot ang target na 3 milyong bagong botante, aakyat na sa 71 milyon ang maaaring bumoto sa mid-term elections.

PANOORIN: Nagparehistro ka na ba para bumoto sa Halalan 2025?

Nakiusap naman ang Comelec na huwag nang ipagpaliban ang registration para hindi malimutan ang deadline nito.

"Hanggang September 30 sila pwedeng magparehistro bagamat ating laging inuulit na paalala na huwag naman sanang sasagarin pa doon dahil baka doon naman mapahaba ang pila," ani Garcia.

Para sa mga kakandidato, mahalaga na nakapagrehistro o transfer ng registration sila noong Mayo 11, 2024 para pasok sa 1-year residency requirement.

Target naman Comelec na gawin sa October 1-8, 2024 ang paghahain ng kandidatura.

Matapos ang October 8 na deadline, hindi na rin papayagan ng Comelec ang substitution.