Arestado ang isang lalaki matapos mangholdap ng isang taxi sa Mandaluyong City.

Kinilala ang suspek na si Joma Niegas na aminadong lasing at naka-shabu.

"Trip trip lang po. Na impluwensyahan lang ako," ayon kay Niegas nang panayamin ng ABS-CBN News.

Kwento ng nabiktimang taxi driver na si Ariel Buslon, sumakay si Niegas at ang 2 nitong kasamahan malapit sa Mandaluyong City Hall.

Nagpapahatid ang mga suspek papunta sa isang mall sa EDSA.

Maya-maya, pinabalik ng mga suspek ang taxi para may kunin na naiwang bag sa Barangay Plainview.

Bumaba ang isa sa kanila. Naiwan si Niegas at ang isang kasamahan nito kung saan nagdeklara sila ng holdap.

"Tinutukan ako ng patalim sa leeg. Takot na takot ako nun. Akala ko papatayin ako," kwento ni Buslon.

Pinalipat ng mga holdaper ang driver sa passenger seat at saka nila minaneho ang sasakyan.

Nasagi pa nito ang ilang tricycle. Habang paatras, sumagi ang bumper nito sa isang plant box kaya tumagilid.

"Nakita ko na lang nakatagilid na. Nagkakagulo mga tao. Mga holdaper pala," sabi ni Arnel Aday, isang barangay tanod sa lugar.

Pinagbubugbog ng mga residente si Niegas at saka inaresto ng Mandaluyong police.

Pinaghahanap pa ng mga pulis ang 2 kasamahan nito. - Ulat ni Jervis Manahan, ABS-CBN News