Watch more in iWantv or TFC.tv

MAYNILA - Kritikal ang isang dating barangay chairwoman nang barilin ng nakamotorsiklong salarin sa harap ng kanyang bahay sa Pasay City, Linggo ng umaga.

Nagwawalis sa labas ng kanilang bahay sa FB Harrison Street ang 58 anyos na si Gina Catalan nang biglang lapitan ng salaring nakaangkas sa motor at saka binaril.

Mabilis namang nakatakas ang mga salarin na parehong hindi pa nakikilala ng pulisya dahil sila ay naka-helmet nang makunan ng CCTV.

Watch more in iWantv or TFC.tv

Naisugod naman agad sa ospital si Catalan na tinamaan ng bala sa batok. Agaw-buhay pa rin sa pagamutan ang biktima.

Samantala, palaisipan naman sa pamilya kung bakit binaril si Catalan, na ngayon ay isa nang housewife at wala namang kilalang nakaaway sa kanilang lugar.

Nangako naman ang pulisya na tututukan ang imbestigasyon sa nangyaring krimen.--ulat mula kay Jervis Manahan, ABS-CBN News