Natangayan ng ilang gadgets ang pamilya ng mang-aawit at Philippine Amusement and Gaming Corporation (PAGCOR) official na si Jimmy Bondoc matapos looban ang kanilang bahay sa Quezon City noong madaling araw ng Martes.

Si Bondoc ay Vice President for Corporate Social Responsibility Group ng ahensiya.

Ayon kay Bondoc, nakuha ng mga kawatan ang laptop ng kaniyang kapatid at ang kamera ng kanilang ama, na kapapanaw lamang.

Watch more in iWantv or TFC.tv

Nakuhanan pa ng CCTV sa bahay nina Bondoc ang insidente.

"Pag pasok niya nag-ikot-ikot siya, kinuha 'yong laptop ng younger sister ko, pero pinakamasakit sa lahat kinuha niya 'yong camera ng daddy ko," sabi ni Bondoc.

"Nandoon pa naman 'yong mga laman ng pictures na huli niyang mga kuha," dagdag ni Bondoc ukol sa ninakaw na kamera.

Ayon kay National Capital Region Police Office chief Director Guillermo Eleazar, posibleng natiktikan ng mga kawatan ang bahay kaya nakapagplano bago sumalakay.

"Nakita naman natin na base sa CCTV ay mukhang sanay na," ani Eleazar.

Patuloy ang imbestigasyon ng pulisya sa insidente at pagtugis sa mga kawatan.

--Ulat ni Jerome Lantin, ABS-CBN News