Umakyat na sa tatlo ang namatay sa pagbaha sa Davao del Sur noong Huwebes, ayon sa Office of Civil Defense.

Pinakahuling natuklasan ang bangkay ng isang babae Biyernes ng tanghali sa ilog sa Brgy. Rizal, bayan ng Bansalan, Davao del Sur.

PANOORIN

Watch more News on iWantTFC

Ayon sa Bansalan Municipal Police Station, napansin ng isang lalaking estudyante ang masangsang na amoy habang dumadaan sa gilid ng ilog.

Hinanap nito kung saan galing ang amoy hanggang sa nakita nito ang bangkay ng babae na nakasuot ng damit na kulay berde.

Lumalabas sa imbestigasyon na tinangay ito ng malakas na agos ng tubig sa ilog sa kasagsagan ng baha noong Huwebes.

Inaalam pa ng mga awtoridad ang pagkakakilanlan ng biktima.

Noong Huwebes, nasawi naman ang isang Evelyn Matango matapos gumuho ang lupa sa kubo nito sa Brgy. Ibo sa Malalag, Davao del Sur.

Nasawi rin ang isang Alex Buela matapos tangayin ng baha habang natutulog sa Brgy. Bolton sa Malalag.

Batay sa pagsusuri ng OCD Region 11, nasa mahigit 6,000 pamilya ang apektado ng baha sa tatlong munisipalidad sa Davao del Sur. Umabot namanna sa 629 na pamilya ang lumikas sa evacuation center.

Ilang pamilya rin ang apektado ng baha at landslide sa karatig lalawigan na Davao Occidental.

Isinailalim na sa state of calamity ang Malalag, Davao del Sur at Sta. Maria sa Davao Occidental.