Watch more in iWantv or TFC.tv

MAYNILA—Tinangay umano ng isang yaya ang isang sanggol na babae sa Barangay Bambang, Taguig City nitong Miyerkoles.

Nakuhanan sa closed-circuit television (CCTV) camera ang yaya na dala ang 5 buwang gulang na sanggol palabas ng bahay.

Kuwento ng inang si Princess Jean Perrin, natutulog siya at kaniyang kinakasama na kapuwang panggabi ang trabaho nang mangyari ang insidente. Nagising na lang sila na wala na ang bata at yaya.

PANOORIN: Kuha sa CCTV ng Bgy. Bambang na dala-dala ng yaya ang sanggol palabas mula sa bahay. Tila umiwas pa siyang makita ng ibang dumaan.

Natutulog noon ang mga magulang ng bata na panggabi ang trabaho. pic.twitter.com/UCropQ7gI5

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) November 13, 2019

Ayon kay Perrin, wala pang isang linggong nanunuluyan sa kanila ang yaya na nagpakilalang si Kristine Joy Salik.

Kinontak sila ng suspek matapos mag-post si Perrin sa social media na naghahanap siya ng bagong mag-aalaga sa bata.

Ayon kay Police Maj. Matron Calyaen ng Taguig City police, posibleng peke ang ginamit na pangalan ng yaya.

Walang nakakakilala sa suspek nang puntahan ng mga pulis ang address sa Rizal na nakalagay sa Taxpayer Identification Number (TIN) ID at barangay clearance nito.

PANOORIN: Panawagan ng mga magulang ni Baby Taylor sa dumukot sa kanilang anak at pasa salamat sa mga tumutulong maghanap sa kanya pic.twitter.com/BLwzgoRJGn

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) November 13, 2019

Paalala naman ni Police Col. Alexander Santos, hepe ng Taguig City police, maging mapagmatiyag sa pagpili ng kasambahay at siguruhing mapagkakatiwalaan pati ang nag-refer nito.

Para sa mga may impormasyon sa kinaroroonan ng bata o ng suspek, maaaring tumawag o magpadala ng mensahe kay Perrin sa 09171790393 o sa Taguig City Police Station hotline na 09395047033 at 86423582.