MAYNILA - Bugbog-sarado ang isang lalaki matapos mahuling nagnanakaw sa dalawang senior high students sa may España Boulevard sa Sampaloc, Linggo ng gabi.

Kinilala ang suspek na si Marlon Satura, 22, na itinakbo sa Ospital ng Maynila matapos magtamo ng mga sugat sa mukha at katawan dahil sa pambubugbog ng taumbayan.

Kuwento ng magkasintahang James Peter at Justine Danielle, pauwi na sila galing sa computer shop sa Morayta nang tutukan sila ng patalim ng suspek bago hablutin ang kanilang cellphone at bag.

Naitulak pa ni Peter si Satura pero nagawa pa ng suspek na iwasiwas sa kanya ang patalim na dumaplis sa ilalim ng tiyan at kaliwang hita ng estudyante.

Agad namang nakahingi ng tulong ang magkasintahan mula sa mga dumadaan sa lugar. Sinubok pa ng suspek na tumakas pero nakorner siya ng rumespondeng grupo ng mga lalaki.

Binubogbog muna ng mga lalaki ang suspek sa gilid ng kalsada bago pinosasan at dinala sa barangay hall.