CEBU CITY - Sugatan ang 3 lalaki nang tumaob ang isang truck na naghahakot ng basura sa mga sementeryo dito sa lungsod, Sabado.

Tumagilid ang sasakyan madaling araw ng Sabado sa kahabaan ng B. Rodriguez Street, ayon kay John Paul Gelasque, officer-in-charge ng Department of Public Services ng lokal na pamahalaan ng Cebu.

Patuloy na ginagamot ngayon ang driver at dalawang loaders na nasugatan sa aksidente, ani Gelasque.

Sasagutin ng Cebu City government ang pagpapagamot sa tatlo, aniya.

Magdamag na naghakot ng kalat sa mga sementeryo ang mga basurero sa lungsod matapos ang Undas, ani Gelasque.

Aabot na sa 40 tonelada ng basura ang nakuha sa mga himlayan mula noong Nobyembre 1, aniya.