Watch more in iWantv or TFC.tv

MANILA -- Ang magkaibigang sina Dino at Maui ay may kakayahan umano na makakita ng mga nilalang na mula sa ibang dimensiyon. Kaya naman hindi na bago para sa magkaibigan ang mga napapansing kaluluwa na diumano ay pagala-gala sa loob ng kanilang campus sa Los Baños, Laguna.

Ito ang bahagi ng espesyal na pagtatanghal noon ng programang 'Magandang Gabi, Bayan' ng ABS-CBN News and Current Affairs sa Channel 2.

Ang ikinabahala nina Dino ay maging sa labas ng kanilang paaralan ay sinusundan din umano sila ng iba pang mga "balisang kaluluwa."

Kuwento ni Dino, isa sa mga hindi niya makakalimutang pangyayari ay nang biglang mayroong sumakay na kaluluwa sa kaniyang sasakyan habang binabagtas niya ang highway sa Calauan, Laguna.

"One time, may nakisakay sa akin na matandang lalaki na naka- barong. 'Tatang, saan ho tayo?' Tapos tumingin lang siya sa akin. Hindi ko nakitang nag-move 'yung mouth niya, basta sinabi niya sa simbahan," kuwento ni Dino.

Matapos dumaan sa simbahan, bigla na lang daw nawala ang kaluluwang ligaw.

Bukod kay Dino, nakaranas din ng iba’t ibang kababalaghan sa Laguna ang dalawa pa niyang kaibigan. Panoorin ang kanilang nakakikilabot na mga kuwento.