Humihingi ng tulong ang 12 pamilyang nawalan ng bahay noong nakaraang linggo matapos bumagsak ang isang malaking puno sa Barangay UP Campus sa Quezon City.

Bumagsak ang isang giant ipil-ipil tree sa mga bahay sa Pook Arboretum noong Oktubre 20 dahil sa malakas na hangin at walang tigil na ulan na dala ng bagyong Pepito.

Ilang talampakan lang ang layo ni Lorna Ordiz sa punong bumagsak kaya inakala niyang hindi na siya makakaligtas.

“Grabe ang kaba, trauma… Feeling namin sa'min pupunta, dumapa na lang ako diyan, pinanood [namin ang] pagbagsak ng kahoy,” ani Ordiz.

Watch more in iWantv or TFC.tv

Posibleng lumambot na rin ang lupang nakapaligid sa puno kaya mabilis ang pagbagsak ng higanteng punong kahoy.

Halos wala nang natira sa ilang bahay at may ilan namang na-trap dahil hindi agad nakalabas.

Nasugatan din ang isang bata na agad isinugod sa ospital.

Ang ilan sa mga residente, wala nang natuluyan nang manalasa naman ang bagyong Quinta ngayong linggo.

Sa jeep muna nanirahan si Louella Belardo at ang kaniyang pamilya.

Nakisilong na muna sa ibang kapitbahay ang ilang pamilya.

Nabibigyan naman daw sila ng relief packs pero mas kailangan daw umano nila ng materyales.

“Sana matulungan kami na maitayo 'yung bahay ulit,” ani Belardo.

— Ulat ni Jervis Manahan, ABS-CBN News