MANILA - Muling nagbuga ng abo ang Mt. Bulusan sa Sorsogon Linggo sa gitna ng ikaapat nitong pagsabog ngayong Oktubre.

Sa litratong kuha ng gurong si Johnberk Evasco mula sa bayan ng Irosin, makikita ang mataas na ash column sa bunganga ng bulkan.

Ani Evasco, maraming residente ng kanilang bayan ang natakot sa malakas na pagsabog ng Bulusan.

Ayon sa inisyal na impormasyon mula sa Philippine Institute of Volcanology and Seismology (PHIVOLCS), umabot sa 2.5 kilometro ang taas ng ash column.

Inaasahang babagsak ang abo sa mga bayan ng Casiguran at Juban, dagdag ng ahensya.

Batay sa abiso ng PHIVOLVS Sabado, nakataas pa rin ang alert level 1 o abnormal level sa bulkan.

Pinaalalahanan pa rin ang mga residente na huwag pumasok sa 4-kilometer radius Permanent Danger Zone (PDZ) dahil sa panganib ng biglang pagbubuga nito ng abo at usok.