(UPDATE) Patay ang 35-anyos na si Jon Ross Delos Santos o mas kilala bilang ang FlipTop rapper si LilJohn matapos pagbabarilin sa Barangay Carsadang Bago 1, Imus City, Cavite Linggo ng hapon.

Ayon kay Police Lt.Col. Junar Alamo, hepe ng Imus City Police, nakaupo ang biktima sa motorsiklo nito sa tapat ng tindahan ng pagkain sa main road ng Legian 2B subdivision nang barilin sa ulo.

Itinakbo pa siya sa ospital ng Imus pero idineklarang dead on arrival.

Fliptop rapper na si John Ross Delos Santos o mas kilalang si LilJohn, patay sa pamamaril sa Bgy. Carsadang Bago 1, Imus City, Cavite (📸: Imus City PNP) pic.twitter.com/cZRdOqVtim

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) October 20, 2019

Ayon sa pulis, 2 basyo ng bala ang narekober sa pinangyarihan ng krimen.

Taga Tambo, Parañaque ang biktima na kilala sa pakikilahok sa mga FlipTop rap battle.

Iniimbestigahan pa ang motibo sa pamamaril.

Nagpaabot ng pakikiramay ang FlipTop Battle League sa official Facebook page nito.

"Sa kabila ng ginagawa namin sa entablado, at sa kabila ng kahit anong di mapagsangayunan ng mga kasapi nito, may special unspoken bond talaga lahat ng emcees at hiphop, lalo't mula sa indibidwal at kolektibong pinagdaanan at pinaghirapan para sa kultura natin, para sa naging kung ano siya ngayon," ayon sa grupo.

"Kaya sobrang bigat, sobrang lungkot... Mula sa buong FlipTop, lahat ng nakasama mo sa hiphop, at lahat ng napasaya at nainspira mo sa battle rap..." dagdag pa ng FlipTop.