Guro, nalunod sa Masagana Falls sa Puerto Princesa

Cherry Camacho, ABS-CBN News

Posted at Oct 16 2017 05:40 PM

Photo Courtesy: Irawan PNP

PUERTO PRINCESA CITY - Patay ang isang 28 taong gulang na lalaki matapos na malunod sa Masagana Falls, Barangay Irawan, Puerto Princesa City, Linggo ng umaga.

Kinilala ang biktima na si Khyme Hikilan, isang MAPEH teacher sa Sicsican National High School at residente ng Golden Valley Barangay Sicsican.

Base sa inisyal na imbestigasyon ng Irawan Police, nagkaroon ng 3 araw na youth retreat at camping ang biktima kasama ang ilang magulang at estudyante.

Matapos nito, nagkayayaan ang mga ito na maligo sa Masagana Falls.

Anim na estudyante ang aksidenteng napunta sa malalim na parte ng talon at dahil dito, ni-rescue ni Hikilan ang mga ito.

Pero ang biktima, hindi na nakaahon dahil sa lakas ng agos ng tubig.

"Tumalon siya sa falls, sumunod yung 6 na estudyante. Pagkatapos, nadala yung mga bata sa malalim na part nung falls, so sinubukan niyang iligtas lahat but then siya ang tinamaan ng current ng tubig… Kinailangan din ng oxygen tank ng mga rescuer para ma-retrieve yung katawan dahil nasa ilalim na siya…" ani Police Senior Inspector Felix Rivera, Station Commander, Irawan Police.

Agad naman na nagsagawa ng joint search and rescue operation ang Philippine Coast Guard at Philippine Navy.

Pasado alas singko y media na ng hapon nang ma-recover ang katawan ng biktima.

Ito naman ang unang insidente ng pagkalunod sa lugar.

Bisitahin ang Patrol.PH para sa iba pang mga balita.