MAYNILA (UPDATE) — Nadalaw ngayong Miyerkoles sa unang pagkakataon ng bilanggong aktibista na si Reina Mae Nasino ang burol ng kaniyang 3-buwang gulang na anak.

Binawian ng buhay noong nakaraang linggo ang sanggol na si River dahil sa pulmonya, 2 buwan matapos mawalay sa ina.

Pasado alas-12 ng tanghali nang makarating si Reina sa punerarya sa Pandacan, Maynila suot ang personal protective equipment at nakaposas.

Tipid man sa salita, napaiyak ang 23 anyos na ina.

Video courtesy of Karapatan

"Masakit sa akin, sabik na ako na makita anak ko pero 'di sa ganyang kalagayan," ani Nasino.

"Nawala pa 'yong isa sa mga kinasabikan ko sa paglaya ko, nawala, pero 'di ibig sabihin noon na 'di ako sabik na lumaya talaga," dagdag niya.

Inireklamo ng pamilya ni Reina ang pananatiling nakaposas niya kahit kumakain. Pansamantala naman itong tinanggal.

Nagkagulo din sa gitna ng dalaw nang pigilan ng mga tauhan ng Bureau of Jail Management and Penology na ma-interview ng media si Reina.

Tinangka rin ng mga awtoridad na ibalik si Reina sa kulungan kahit may higit isang oras pang natitira sa dalaw nito.

Watch more in iWantv or TFC.tv

Kasabay ng kaniyang unang pagbisita, binawasan din ngayong Miyerkoles ng Manila Regional Trial Court Branch 47 ang haba ng panahong maaaring mabisita ni Reina si River.

Mula 3 sunod-sunod na araw, iniksian ito sa 6 na oras o 3 oras ngayong Miyerkoles at 3 oras sa libing ng sanggol sa Biyernes.

• Court reduces furlough granted to activist visiting baby's wake

Tinutulan kasi ng mga tauhan ng Manila City Jail ang 3 araw dahil kulang umano sila sa tauhan at walang sapat na pasilidad para sa quarantine.

"Walang puso 'yong nagdesisyon noon. Noong nabubuhay pa 'yong anak ko, pinagkait din sa akin na makasama anak ko, makalinga ko, pati ba naman sa burol, pinagkait din sa akin?" ani Reina.

Hanggang ngayon, iginigiit ni Reina na inosente siya.

Nobyembre 2019 nang mahuli si Reina sa Tondo, Maynila— bahagi ng umano'y crackdown sa mga makakaliwa. Kinasuhan siya ng illegal possession of firearms and explosives.

"Hindi makatao 'yong paghuli sa akin. Biglaan kaming pinasok nang wala kaming kamalay-malay. Tinaniman kami ng granada," ani Reina.

Nangako si Reina sa namayapang anak na itutuloy niya ang laban hanggang sa ganap nang makalaya mula sa kulungang naghiwalay sa kanilang mag-ina.