BALABAC, Palawan (UPDATE) - Patay na nang makuha ang isang 20-anyos na lalaki nitong Martes matapos sakmalin ng buwaya sa Sitio Caguisan, Barangay Salang dito sa bayan.

Ayon sa Palawan Provincial Police Office, habang sakay ng bangka at nanghuhuli ng pusit si Junick Husin at isang Edgar Legazpi ay bigla nilang nabangga ang buwaya. Tumaob ang bangka at dito inatake ng buwaya si Husin.

"Dahil malaki itong buwaya ay tumaob po yung kanilang bangka at pagkataob nitong bangka, nasakmal po itong isa, itong biktima," sabi ni Police Major Ric Ramos, tagapagsalita ng Palawan Provincial Police Office

Agad namang lumangoy si Legazpi palayo para humingi ng tulong.

Sinundan ng mga residente ang buwaya na nakitang kagat-kagat pa ang biktima.

Napatay ang buwaya at saka pa lang nila tuluyang nakuha sa bibig nito si Husin.

"Opo, nakuha po sa bibig at talagang eventually po ay pinatay po nila itong buwaya para po makuha ito pong biktima na ito,” sabi ni Ramos.

Ito na ang pang-limang insidente na may namatay sa pag-atake ng buwaya ngayong taon sa magkakaibang barangay sa Balabac.