MAYNILA (UPDATE) —Arestado ang 2 lalaking Chinese na nagtangka umanong manuhol sa pulis kapalit ng pagpapalaya sa 6 nilang kasamahan na naaresto sa raid sa hotel sa Makati.

Kinilala ang mga suspek na sina Zhao Xiuquiang, 32, at Fan Jianping, 23.

Watch more in iWantv or TFC.tv

Naganap ang umano’y panunuhol nitong Martes sa opisina ni Police Maj. Gideon Ines, hepe ng investigation section ng Makati City police.

Kuwento ni Ines, inilapag ni Xiuquiang ang P1.3 million sa kaniyang mesa at sinabing kapalit ito ng hindi pagtuloy ng kaso laban sa 6 nitong kaibigan na nakakulong.

WATCH: Police video of the arrest of one Chinese man after he allegedly placed P1.3 million cash on the desk of Makati investigation chief PMAJ Gideon Ines, telling him "This is for you."

(📸: Makati City Police) pic.twitter.com/1xxV6u0ZZ2

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) October 8, 2019

Nagdala rin ng karagdagang P400,000 si Jianping. Sa kabuuan, P1.7 million na halaga ang pilit inabot sa pulis.

Kasama ang 6 na Chinese sa 20 banyagang inaresto nang salakayin ng Makati City police ang isang hotel sa Barangay Poblacion noong Lunes na sangkot umano sa prostitusyon.

Nasagip din sa operasyon ang 35 babaeng Chinese na ibinubugaw umano sa kapuwa Chinese.—Ulat nina Jeffrey Hernaez at Anjo Bagaoisan, ABS-CBN News