MAGUINDANAO — Posible umanong “hate crime” laban sa mga miyembro ng LGBT community ang nangyaring pambobomba nitong Sabado sa bayan ng Datu Piang sa lalawigang ito, ayon sa tagapagsalita ng lokal na unit ng militar.
“We found out na itong mga kabataan na miyembro ng LGBT sa Datu Piang ay naka-receive ng death threats from BIFF-Karialan faction, na sila ay binabantaan na sasaktan ng nasabing grupo kung hindi nila ide-denounce yung kanilang affiliation sa LGBT,” sabi ng spokesperson ng 6th Infantry Division na si Lt. Col. John Paul Baldomar.
Sugatan ang walong indibidwal matapos ang nangyaring pambobomba sa covered court sa plaza ng Datu Piang habang ginaganap ang isang volleyball tournament noong Sabado ng hapon.
Anim ang na-admit sa ospital, kung saan isa ang kritikal ang kalagayan.
Ang natitirang dalawa naman ay may mga galos at kaunting sugat.
Ang mga biktima ay mga miyembro ng lesbian, gay, bisexual, and transgender (LGBT) community.
Sabi ni Baldomar, patuloy ang pagtugis sa mga miyembro ng BIFF, na tuloy-tuloy ang operasyon sa ilang bayan sa Maguindanao simula pa noong mga nakaraang buwan.
--ulat ni Chrislen Bulosan
FROM THE ARCHIVES