Watch more in iWantv or TFC.tv

MAYNILA - Umalma ang ilang mga magulang sa pagpapasara ng Old Sta. Mesa bridge na nagdudugtong sa Maynila at San Juan.

Ikinagalit ng ilang mga magulang ang pagpapasara sa tulay dahil wala anilang abiso man lamang at ang kanilang mga anak na estudyante ang magdurusa.

Karamihan ng mga batang nakatira sa Sta. Mesa ay sa San Juan nag-aaral.

Lunes ng gabi nang isara ang tulay para masimulan ang pagkukumpuni nito.

• Old Sta. Mesa Bridge, isinara para sa pagkukumpuni

Maging ang pagtawid sa tulay ay ipinagbawal na.

Ayon sa mga magulang, dagdag gastos ito at oras sa biyahe sa mga estudyante.

Hiling nila na sana ay mabigyan ng pansamantalang tulay na pwedeng daanan ng mga bata papuntang eskuwelahan o di kaya ay shuttle service dahil hirap sila sa pagsakay papunta at pauwi ng kani-kanilang mga paaralan.

Nagsimula na rin ang pagpapakumpuni ng Nagtahan flyover. Sarado ang isang lane nito tuwing alas-11 ng gabi hanggang alas-5 ng umaga.

Nananatiling sarado naman ang Otis Bridge dahil sa patuloy na pagpapakumpuni rito.

Bukod sa mga estudyante, inaasahan rin ang pagbigat ng daloy ng trapiko sa mga lugar na maaapektuhan ng pagpapasara ng mga nasabing tulay lalo pa't papalapit na ang Kapaskuhan. Jekki Pascual, ABS-CBN News