Ilang barangay sa Zamboanga City, lubog sa baha dahil sa malakas na ulan ngayong Biyernes ng hapon. Apektado ang lungsod ng habagat na pinaigting ni #OmpongPH. | ulat ni Jewel Reyes, ABS-CBN News (Kuha ni Noning Antonio) pic.twitter.com/YhEn2G5G24

— ABS-CBN News (@ABSCBNNews) September 14, 2018

ZAMBOANGA CITY - Nalubog sa baha ang mga bahay sa isang barangay sa lungsod na ito Biyernes ng hapon.

Alas-3 ng hapon nang bigla umanong tumaas ang tubig sa ilog at umapaw sa mga bahay.

Ang ilan, nabigla umano sa biglaang pagtaas ng tubig dahil hindi naman umano umuulan sa mga oras na iyon.

Pero paliwanag ng City Disaster Risk Reduction and Management Office (CDRRMO), nanggaling ang tubig sa bundok kung saan malakas ang buhos ng ulan simula pa Biyernes ng umaga.

Pinapayuhan ngayon ng CDRRMO ang mga nakatira sa tabi ng ilog na lumikas muna habang patuloy ang pagtaas ng baha.

Pero ang ilang residente, ayaw pa rin lumikas. Oobserbahan umano muna nila ang kondisyon ng panahon bago magdesisyon.

Kasama ang siyudad sa mga lugar sa bansa na apektado ng habagat.