Watch more in iWantv or TFC.tv

MAYNILA - Patay ang isang lalaki matapos pagbabarilin ng riding-in-tandem sa Baclaran, Parañaque City Huwebes ng gabi.

Ayon sa punong-barangay na si Jun Zaide, hindi na umabot nang buhay sa ospital ang hindi pa nakikilalang biktima matapos magtamo ng mga tama ng bala sa itaas na bahagi ng katawan.

Sa kuha ng CCTV ng katabing establisiyimento, nakitang nakatayo ang biktima sa sidewalk sa Quirino Avenue malapit sa kanto ng Airport Road pasado alas-7 ng gabi.

Naka-sombrero siya at may suot na backpack sa harapan. Napatakbo siya nang paputukan nang ilang beses ng angkas ng motorsiklo na tumigil malapit sa kanya.

Agad umalis ang mga salarin.

LOOK: A man waiting at a sidewalk along Quirino Avenue in Baclaran, Parañaque is shot & killed by motorcycle-riding assailants.

(📸: Bgy. Baclaran) pic.twitter.com/VGRYj8lHeh

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) September 10, 2020

Nakaligtas naman ang isang lalaking nakaparada ang e-bike na nataong nasa gitna ng namaril at ng biktima.

Tumakbo pa ang biktima sa loob ng katabing botika at doon na nawalan ng malay.

Narekober ng pulis ang 10 basyo ng bala ng hinihinalang caliber .45 na baril.

Ayon sa barangay, hindi taga-roon ang biktima.

Patuloy na iniimbestigahan ng Parañaque Police ang motibo sa pamamaril.