Dalawang beses nasunog ang bahagi ng isang restaurant sa Tomas Morato, Barangay South Triangle sa Quezon City ngayong Miyerkoles.

Pasado alas-3 ng madaling araw nang sumiklab umano ang sunog sa kusina ng Annabel's, na agad naapula ng mga bombero kaya hindi na umabot sa unang alarma.

Nagmula ang apoy sa exhaust vent ng kusina, base sa paunang imbestigasyon ng mga tauhan ng Bureau of Fire Protection (BFP).

Watch more News on iWantTFC

Pero sumiklab muli ang sunog sa resaurant pasado alas-7 ng umaga.

Kinailangan pang akyatin ng mga bombero ang bubong ng restaurant para apulahin ang apoy.

Pansamantalang isinara sa mga motorista ang bahagi ng Tomas Morato mula Scout Lascano hanggang Scout De Guia.

Dahil sa sunog, tigil-operasyon muna ang restaurant.

Ayon sa security guard na si Regino Anoba, gawa sa light materials ang gusali ng restaurant, na itinayo pa noong dekada '80.

Itinaas sa unang alarma ang ikalawang sunog, na idineklarang fire out bago mag-alas-10 ng umaga.

Wala namang nasaktan o nasawi sa insidente, at inaalam pa ng BFP ang halaga ng pinsala sa sunog.

— Ulat ni Jeff Caparas, ABS-CBN News