4-anyos ginahasa, pinatay umano ng 17-anyos binata sa Caloocan

Zyann Ambrosio, ABS-CBN News

Posted at Aug 31 2020 05:33 PM | Updated as of Sep 01 2020 04:51 PM

Sa imbestigasyon ng mga pulis, ginahasa at dalawang beses na pinukpok sa ulo ang bata ng hindi pa tukoy na bagay. Screengrab

MAYNILA (UPDATE) — Arestado ang isang binata nitong Lunes na nanggahasa at pumatay umano sa 4 taong gulang na babae sa Caloocan City. 

"Hindi ko po kayang tingnan... Napakasakit po sa akin... Tatay po tayo eh. Hindi na nga po ako nakatulog kagabi dahil kagabi umiiyak na din kami," ayon kay alyas "Ruben," ama ng biktima. 

Watch more in iWant or TFC.tv

Sa crime scene, kitang tinabunan na lang ng dahon ang katawan ng biktima matapos umanong gahasain at patayin sa likod ng bakuran ng isang abandonadong bahay sa Caloocan City.

Kuwento ng ama ng biktima sa mga pulis, huli niyang iniwan ang kanyang anak sa isang palaruan sa kanilang compound noong Linggo ng tanghali. 

Pero nang balikan niya ang anak sa palaruan nang alas-4 ng hapon ay wala na ito doon.

Hanggang sa may nagsumbong na residente sa barangay at sinabi kung sino ang huling nakasama ng bata: isang 17-anyos na binata.

"Nung medyo nahimasmasan siya kanina, inamin niya na siya ang kumuha sa bata... Dala ng kalasingan. Pinukpok niya raw ang bata dahil maingay," ani Police Maj. Allan Papa ng Caloocan police. 

Sa imbestigasyon ng mga pulis, ginahasa at dalawang beses na pinukpok sa ulo ang bata ng hindi pa tukoy na bagay.

Kinasuhan ang binata ng rape with homicide pero dahil menor de edad ay hindi pa alam kung makukulong ito. 

Nakatakda ring ipasailalim sa drug test ang suspek. 

Bisitahin ang Patrol.PH para sa iba pang mga balita.