MAYNILA -- Isang babae ang natagpuang patay sa tabing ilog ng Lorraine St. Parkway Village, Brgy. Apolonio Samson sa Quezon City, Linggo ng madaling araw.

Ayon sa nakakita na si Samuel Balatong, nangangalakal siya ng basura sa may ilog pasado 3 a.m. nang makita niya ang bangkay sa pampang.

"Nagulat po ako may nakita akong nakaganung siko. Akala ko po yung lagayan ng damit sa mall. Pagtingin ko tao kasi may bracelet na silver eh...parang tumaob na nakatagilid," kuwento niya.

"Umakyat po ako tumakbo agad papuntang barangay," ani Balatong.

Ayon sa barangay, hindi pa matukoy kung taga-saan ang babae dahil walang nakakakilala rito. Posibleng inanod umano ang bangkay mula sa ibang lugar.

Kasalukuyang iniimbestigahan ng Quezon City Police Station 1 ang nangyari.