ZAMBOANGA CITY - Dalawang hinihinalang kasabwat ng Abu Sayyaf Group ang nahuli dito sa lungsod, Miyerkoles.

Nagpakilala ang mga suspek bilang mga "volunteer tanod" sa Barangay Taluksangay ngunit nakuha mula sa kanila ang matataas na kalibre ng baril at mga pampasabog nang siyasatin ng mga awtoridad, ayon sa isang report mula sa Police Regional Office 9 (PRO9).

Nakuha mula sa mga suspek ang isang M16 rifle, dalawang kalibre .45 na baril, isang 9mm pistol, dalawang bote ng ammonium nitrate, at isang time fuse, ayon sa mga pulis.

Matagal nang minamanmanan ng mga pulis ang dalawang 'di pinangalanang suspek, ayon kay Chief Supt. Billy Beltran, direktor ng PRO9.

Ang mga suspek ay miyembro ng isang gun-for-hire group na sangkot sa tatlo o apat na insidente ng pamamaril sa Zamboanga, ani Beltran.

Nagsisilbi rin umano silang mga "spotter" ng Abu Sayyaf group tuwing sila ay magsasagawa ng pangingidnap o illegal gun trade, dagdag ni Beltran.

Iniimbestigahan pa ng mga pulis kung may iba pang kasabwat ang 2 suspek.

Kakasuhan ang mga suspek ng illegal possession of fire arms and explosives.