BALABAC, Palawan - Isang Indonesian vessel ang namataan sa karagatan ng Barangay Melville sa bayang ito.

Unang nakita ang lantsa noong Huwebes. May marka itong M/L SKPT Natuna 51. Wala ring naabutang crew na sakay dito.

Sa pakikipag-ugnayan sa mga opisyal ng Indonesia, nakumpirmang noon pang ika-11 ng Hulyo nawawala ang lantsa mula sa Natuna Region.

Tinangay umano ito at hindi na natagpuan. Wala naman umanong sakay ang nasabing lantsa nang tangayin.

"Wala po talaga siyang crew. Nakatali lang po 'yung boat. So, talagang napadpad siya without a crew aboard kasi po masama 'yung panahon. Na-prove din po natin 'yun dahil po sa last GPS reading po natin sa kanila, ay doon pa sa Natuna Indonesia 'yung last GPS reading nila. So, talagang 'yun po 'yung huling spot na pinanggalingan ng boat na ito," paliwanag ni Cpt. Cherryl Tindog, public affairs official ng Western Command.

"Pinapakita po nito na wala po tayong dapat ikabahala. Pero siyempre po sa atin po sa security sector, we are treating every information, every situation very seriously. So, patuloy po 'yung pagbabantay po natin sa mga karagatan," ani Tindog.

Dinala na ang lantsa sa ligtas na lugar at nakatakdang iturn-over.