5 taong paghihiwalay ng mag-asawa pwedeng basehan ng annulment, giit ng kongresista

Zandro Ochona, ABS-CBN News

Posted at Jul 24 2019 03:58 PM | Updated as of Jul 24 2019 06:46 PM

MANILA - Isinusulong sa House of Representatives ang isang panukala na maaari nang mag-file ng annulment ang mga mag-asawang 5 taon nang hiwalay.

Layon ng House Bill 502 na inihain ni Surigao del Norte Rep. Robert Ace Barbers na amyendahan ang ilang probisyon sa Family Code of the Philippines para mas mapadali ang pakikipaghiwalay sa asawa.

Ang panukala ay kikilala sa reyalidad na umiiral sa marital condition ng mga Pilipino, paliwanag ni Barbers.

Hindi na kailangan ng malalim na rason para mabatid ang dahilan ng paghihiwalay ng mga mag-asawang sumasalang sa annulment, aniya.

Giit ni Barbers, sapat na ang 5 taon para makapag-adjust at makapag-move on ang mga mag-asawang nagdesisyon na maghiwalay na.

Mas mainam na ito imbis na maglabasan pa ng kung anu-anong issue kapag may annulment, sabi ng kongresista.

Bisitahin ang Patrol.PH para sa iba pang mga balita.