Abogado patay sa pamamaril sa Negros Oriental

Nico Delfin, ABS-CBN News

Posted at Jul 23 2019 08:55 PM

GUIHULNGAN CITY, Negros Oriental - Patay sa pamamaril ang isang 53 anyos na abogado sa Barangay Poblacion sa lungsod na ito Martes ng hapon.

Kinilala ang biktima na si Anthony Trinidad. Sakay si Trinidad at ang asawa nito sa kanilang sasakyan at pauwi na sana mula sa isang hearing sa karatig-bayan ng La Libertad nang pagbabarilin ng nakamotorsiklong salarin.

Namatay si Trinidad dahil sa mga tama ng bala sa katawan, habang sugatan ang kaniyang asawang agad na naisugod sa ospital.

Isang pedicab driver din ang nasugatan nang mabundol ng minamanehong sasakyan ng nasawing abogado.

Patuloy pa ang imbestigasyon sa insidente.

Samantala, kinondena ng grupong Defend Negros ang pagpaslang kay Trinidad, na isang human rights advocate at tagapagtanggol ng mga political prisoner sa rehiyon.

Nagpaabot din ng pakikiramay ang grupo sa pamilya at mga kaibigan ni Trinidad at nangakong patuloy na mananawagan ng hustisya para sa kaniyang pagkamatay.

 
Bisitahin ang Patrol.PH para sa iba pang mga balita.