Pansamantalang isinara ang Pasig Potrero Bridge sa Subic-Clark-Tarlac Expressway (SCTEX) nitong hapon ng Linggo.

Ayon kay Robin Ignacio, head ng traffic operations ng North Luzon Expressway (NLEX), isinara ang naturang bahagi ng SCTEX simula alas-3:30 ng hapon para magsagawa ng safety inspection.

Ito'y dahil umano sa ilang araw nang malakas na ulan at agos ng tubig at lahat.

Karamihan sa mga maaapektuhang ruta ay patungo sa mga lugar sa pagitan ng Clark at Subic, tulad ng Porac at ilang bahagi ng Floridablanca sa Pampanga.

Inabisuhan ang mga motorista na puwedeng daanan ang mga sumusunod na alternatibong ruta:

Mula Manila papuntang Subic
NLEX San Fernando Exit - Jose Abad Santos Avenue - Subic

Mula Tarlac papuntang Subic
SCTEX - NLEX San Fernando Exit - Jose Abad Santos Avenue - Subic
Puwed ering dumaan ang Class 1 vehicles sa SCTEX Clark South Exit - Friendship Highway - Angeles Porac Junction - SCTEX Porac Entry

Mula Subic hanggang Maynila / Tarlac
Jose Abad Santos Avenue - NLEX San Fernando Entry - Manila / Tarlac

"Kaunting pang-unawa, para sa safety natin ito kasi kailangang ma-check na nasa tamang integrity 'yong ating bridge dahil doon sa malalakas na pag-ulan o malakas na agos ng tubig-ulan at lahar doon sa ilalim so nakakaapekto sa integrity ng ating bridge," ani Ignacio.

-- May ulat ni Gracie Rutao