PatrolPH

'Naka-duct tape, tinalian ng alambre': 6-anyos, 3 iba pa natagpuang patay sa Misamis Oriental

ABS-CBN News

Posted at Jul 11 2022 07:15 PM | Updated as of Jul 11 2022 09:34 PM

MANILA — Natagpuang patay ang 4 na lalaki na puno ng tama ng bala ng baril sa katawan sa bayan ng Villanueva, Misamis Oriental noong Sabado ng gabi.

Kabilang sa mga biktima ang isang 6-anyos na bata at isang 15-anyos na binatilyo.

Pawang naka-duct tape ang mga bibig ng mga biktima at tinalian ng alambre ang kanilang mga kamay nang makita sila pasado alas-9 ng gabi noong Sabado sa Barangay Imelda sa naturang bayan.

Kinilala ng pulisya ang mga biktima na sina Noel Bado, 30 anyos; Joyjoy Canoy, 29 or 39 anyos; Marc Rounin Lacoto, 15 anyos; at Miller Lacoto, 6 anyos. 

Ayon sa imbestigasyon ng Police Regional Office (PRO) 10, mula sa Iligan City ang mga biktima at bumiyahe sila nitong Sabado ng hapon papuntang Initao, Misamis Oriental para maningil ng utang na nagkakahalaga ng mahigit P100,000.

Pagsapit ng alas-7 ng gabi, nakitang nasunog ang kanilang sinasakyang taxi sa kalapit na bayan ng Naawan, Misamis Oriental.

Pagkalipas ng 2 oras, natagpuan ang mga bangkay ng mga biktima.

Ayon sa tagapagsalita ng PRO-10 na si Lt. Col. Michelle Olaivar, posibleng ibang sasakyan na ang nagdala sa mga biktima sa lugar kung saan natagpuan ang kanilang mga bangkay.

Nakitang may mga tama ng baril ang mga biktima sa kani-kanilang mga ulo at iba't ibang bahagi ng katawan.

Maliban sa sinasabing paniningil ng utang, patuloy pa ang imbestigasyon ng mga pulis sa motibo ng krimen.

Mayroon na rin umanong mga person of interest na kinilala ang pulisya.

—Ulat ni Angelo Andrade

Bisitahin ang Patrol.PH para sa iba pang mga balita.