Grade 7 student binaril sa loob ng eskuwelahan sa Laguna

MAYNILA (UPDATE) - Pumanaw na ang Grade 7 na estudyante sa Calamba, Laguna na binaril sa loob ng kaniyang eskuwelahan nitong Huwebes, ayon sa pulisya.

Ayon kay Col. Eleazar Matta, provincial director ng Laguna Police, nasa loob ng classroom ang biktima nang pumasok ang gunman at binaril ito.

Nadala pa sa HealthServ hospital ang biktima, kung saan idineklara itong brain-dead ng doktor na si Richmonde Gole. Bandang alas-4 ng hapon binawian ng buhay ang biktima.

Kinse anyos ang biktima, at naninirahan sa Pansol, Calamba City.

Alam na ng pulisya ang pagkakakilanlan sa suspek, na tinutugis na ngayon.

Ayon sa bantay sa umaga ng paaralan na si Arman Dacuycuy, sumabay ang suspek sa mga construction worker na pumasok sa maliit na gate.

Nangyari umano ang pamamaril alas-12:30, nang bigla na lamang binaril nang dalawang beses ang biktima ng lalaking nasa edad 30-35 anyos.

Ayon sa ulat ng pulisya, natanggap nila ang ulat tungkol sa pamamaril ala-1:50 ng hapon.

Kilala umano ng bata ang suspek.

Ayon kay Maj. Mark Julius Rebanal, hepe ng Calamba police Women and Children Protection Desk, selos ang isa sa mga motibong tinitingnan sa krimen.

"One of the motives that we are looking into is jealousy. There is a reported relationship. There is security in the school, however, the suspect is also the one who fetched the victim that's why the guard presumed that the suspect will not harm the victim," ani Rebanal sa isang panayam.

-- Ulat nina Zhander Cayabyab at Vivienne Gulla, ABS-CBN News