PatrolPH

Kaanak ni Jose Rizal, nanumpa bilang mayor ng Calamba

Dennis Datu, ABS-CBN News

Posted at Jun 30 2022 04:30 PM

MANILA — Nanumpa na si Rosseller "Ross" Rizal bilang ika-23 alkalde ng Calamba City, Laguna.

Mula sa angkan ni pambansang bayani Dr. Jose P. Rizal ang bagong alkalde. 

Nagsimula si Rizal na magsilbi sa pamahalaan noong 1986 bilang clerk.

Bago nahalal na mayor, nagsilbi siyang bise-alkalde ng lungsod.

Pinalitan niya bilang mayor si Timmy Chipeco.

Halos 20 taon na hinawakan ng pamilya Chipeco ang pamumuno sa Calamba City, kung saan ipinanganak at lumaki si Gat Jose Rizal.

BIÑAN 

Sa Biñan City, Laguna naman, nanumpa na rin sa tungkulin si Atty. Arman Dimaguila, Jr. bilang mayor.

Nasa ikatlo at huling termino na si Mayor Dimaguila.

Nanumpa na rin si Vice Mayor Gel Alonte at mga miyembro ng Sangguniang Panglungsod.

Sa Batangas, muling nanumpa sa tungkulin si Hermilando Mandanas bilang gobernador para sa kaniyang ikatlo at huling termino.

Sa Oriental Mindoro, nanumpa na rin sa tungkulin ang actor na si Ejay Falcon bilang vice governor.

Kasabay niyang nanumpa si Humerlito Dolor bilang gobernador na nasa ikalawang termino na.

Bisitahin ang Patrol.PH para sa iba pang mga balita.