Maternity benefits ng SSS papalo sa P70,000 pagsapit ng Enero 2020

ABS-CBN News

Posted at Jun 27 2019 12:57 PM

MAYNILA — Inanunsiyo ng Social Security System (SSS) nitong Huwebes na aabot na sa P70,000 ang maximum maternity financial assistance na maaari nilang maibigay simula sa Enero 2020.

Sabi ni SSS President and CEO Aurora Ignacio, ito ay kasunod ng implementasyon ng Republic Act No. 11210 o Expanded Maternity Leave Act at pati na rin ng SSS Act of 2018.

Tumataas daw ang SSS benefits na makukuha ng mga miyembro dahil rin sa ipinatutupad na bagong minimum at maximum monthly salary credit.

Dahil daw dito, aabot sa lagpas doble ang maternity benefit na makukuha ng isang nanay na dating nakakatanggap lang ng P32,000.

Ayon rin kay Ignacio, magmula nang maipatupad ang Expanded Maternity Leave Act, umabot na sa higit 122,000 nanay ang nakapag-avail ng dagdag-benepisyo.

Katumbas ito sa P2.67 bilyon na maternity benefits mula Enero hanggang Abril nitong taon, mas mataas ng 15.09 porsiyento sa kaparehong panahon noong nakaraang taon.

—Ulat ni Joyce Balancio, ABS-CBN News

Bisitahin ang Patrol.PH para sa iba pang mga balita.