Mahigit P40,000 halaga ng ilegal na kahoy, nakumpiska sa Surigao del Sur

Charmane Awitan, ABS-CBN News

Posted at Jun 21 2019 02:54 AM

Nakumpiska sa isang joint anti-illegal logging operation ang kabuuang 1,919.28 board feet ng mga ilegal na forest product gaya ng lawaan, yakal at almasiga, Miyerkules ng hapon sa Sitio Nangka, Cabangahan at Cabas-an, Cantilan, Surigao del Sur.

Ito ay may market value na mahigit sa P38,000.

Habang ibinabiyahe ang mga nakumpiskang ilegal na kahoy, naharang din ng awtoridad ang mga pinutol na kahoy ng manga-manga species na nagkakahalagang mahigit P4,000.

Nasa kustodiya na ng lokal na Department of Environment and Natural Resources ang mga nakumpiskang kahoy. Inihahanda na rin ang kasong isasampa laban sa may-ari ng mga kahoy.

Ang nasabing operasyon ay inilunsad ng 36th Infantry Battalion, 1302nd Mobile Company, Regional Mobile Force Battalion 13, at CENRO-DENR Cantilan.

Bisitahin ang Patrol.PH para sa iba pang mga balita.