Watch more in iWantv or TFC.tv

Nagsalita na ang Tentay Food Sauces Incorporated matapos mapasama ang ilan nilang produktong suka sa listahan ng Food and Drug Administration ng mga kumpirmadong may synthetic acetic acid.

• FDA: 5 vinegar variants 'found to contain synthetic acetic acid'

Paliwanag nila, galing sa kanilang supplier ang vinegar concentrate na ginagamit ng kanilang kompanya sa paggawa ng suka.

Dagdag nila, bago pa lang ang kumpanya nila sa paggawa ng suka kaya kinakailangan pa nilang bumili sa labas ng accelerated o mother vinegar na ihahalo sa tubig na magiging sukang ibebenta sa merkado.

Nagtataka rin umano sila kung bakit pumasa ang kanilang sangkap sa standards ng ibang bansa pero bumagsak naman ito sa Pilipinas.

“We buy our concentrates and then we add water and other spices. Siguraduhin natin na 'yung pinagbilhan ng concentrate ay wala silang ilagay," ani Velia Cruz, may-ari ng Tentay Food Sauces Inc.

"We are close to international standards. Don't you think na it's high time we review Philippine standards?" dagdag niya.

Base sa administrative order (AO) ng FDA na nilagdaan noong 1970, ang pagkakaroon ng synthetic acetic acid at cloudifying agent o 'yung nagpapaputi sa likido ay pinagbabawal kaya hindi puwedeng ibenta.

Mula noon wala pang bagong AO na gumagabay sa paggawa ng sukang ibinebenta sa publiko.

Aminado rin ang FDA na kailangan nang review-hin ang kasalukuyang standards.

Kakausapin din ng FDA ang iba pang manufacturer tungkol sa paglalagay ng cloudifying agent sa mga suka, ani Health Undersecretary Eric Domingo, na tumatayong officer-in-charge ng FDA.

“We have to consider the farmers, manufacturers, and the consumer to come up with the best standards, na ang ating standards right now ay dapat walang synthetic acetic acid at cloudifying agent,” aniya.

Umaaaray ang Tentay dahil nadadamay sa isyu ang iba nilang produkto.

Pero paalala ni Domingo ang mga produkto lang na nasa listahan ang kanilang pinapa-recall.

“The assumption is if it's out in the market and it is FDA-registered in the FDA then it's safe,” ani Domingo.

Ayon sa Tentay, iimbestigahan din nila ang kanilang mga supplier para malaman kung may synthetic acetic acid ang kanilang nabibiling accelerated vinegar.

--Ulat ni Raphael Bosano, ABS-CBN News