Babaeng tangan ang anak, nasagip nang tumalon sa barko sa Dipolog

Dynah Diestro, ABS-CBN News

Posted at Jun 01 2019 09:45 AM

Agad nasagip ang isang babae matapos tumalon mula sa barko karga ang kaniyang 7-buwang gulang anak. Dynah Diestro, ABS-CBN News

DIPOLOG CITY – Kasalukuyang nagpapagaling sa ospital ang isang babae matapos na tumalon habang karga ang kaniyang 7-buwang gulang na sanggol mula sa barko malapit sa pier dito sa siyudad, Biyernes ng umaga.

Tumalon umano ang 34 anyos na babae nang malapit nang dumaong ang barkong galing Cebu City sa pier ng Dipolog.

Agad namang na-rescue ng mga tripulante ng barko ang mag-ina.

Ayon kay Petty Officer 3rd Class Errol Rayala, agad silang tinawagan ng chief steward ng barko at humingi ng tulong para magpatawag ng ambulansya na magdadala sa ospital sa mag-ina.

“Nasa 4 nautical miles na lang ang layo ng barko para makadaong pero itong pasahero agad nang tumalon sa barko,” sabi ni Rayala.

Kuwento ng nakakitang steward na si Junalyn Rejas, nakita niyang parang nag-aaway ang biktima at asawa nito bago tumalon ang babae.

Patuloy pa ang imbestigasyon ng awtoridad ang insidente.

Bisitahin ang Patrol.PH para sa iba pang mga balita.