DAVAO CITY – Nagkasa ng sorpresang inspeksiyon sa mga selda ng Santa Ana Police Station ang awtoridad laban sa posibleng mga kontrabandong naitago doon ng mga preso, Huwebes ng gabi.

Pansamantalang inilipat ang mga bilanggo sa isang sulok at pinasok ng mga pulis ang selda ng mga lalaki at babae. Isa-isang sinuyod ang kanilang mga gamit para makita kung may naipuslit na kontrabando.

Maging ang kanilang tulugan na duyan ay tinanggal at pati mga pader ay siniyasat din.

Hindi umabot ng isang oras ang pag-inspeksyon at nalikom ng mga pulis ang mga pakete ng sigarilyo, kitchen utensils, nail cutters, baraha, toothbrush, lighter at marami pang iba.

Nabigla man ang mga bilanggo sa operasyon, pero anila wala nang magagawa pa.

Dalawang beses umano sa isang buwan magsasagawa ng inspeksyon ang awtoridad upang matiyak na walang makapagpupuslit ng kontrabando sa loob ng selda.