Ipinasasauli na ng Commission on Audit (COA) ang milyon-milyong halaga ng sobrang allowance at honoraria na tinanggap umano ng ilang opisyal ng Office of the Solicitor General (OSG).

Base sa audit report ng COA para sa taong 2017, pinakamalaki ang natanggap ni Solicitor General Jose Calida na higit P7.4 milyon.

Bukod kay Calida, ipinababalik din ng COA ang sumobrang allowance ng mga sumusunod na opisyal ng OSG:

• Henry Angeles - ₱ 697,039.15
• Herman Cimafranca - ₱ 62,454.00
• James Cundangan - ₱ 448,707.83
• Renan Ramos - ₱ 837,252.00
• Rex Bernardo Pascual - ₱ 9,394.00
• Bernard Hernandez - ₱ 136,814.72
• Ma. Antonia Edita Dizon - ₱ 273,746.44
• Raymund Rigodon - ₱ 363,894.00
• Danilo Leyva - ₱ 50,051.82
• Lilian Abenojar - ₱ 90,626.00
• John Dale Ballinan - ₱ 99,026.00
• Perfecto Adelfo Chua Cheng - ₱ 158,501.85
• Leney Layug-Delfin - ₱ 70,626.00
• Gift Mohametano - ₱ 13,739.83

SOURCE: COA ANNUAL AUDIT REPORT 2017

Kung susumahin ay aabot sa higit P10 milyon ang kabuuan ng ipinasasauli ng COA.

Dagdag ng COA, ang allowance na nakuha ng ilang opisyal ng OSG ay sobra sa kalahati o 50 porsiyento ng kani-kanilang suweldo kada taon.

Nagpasaring naman ang isang kongresista sa umano'y "sadya" na pagkuha ng sobrang pera ni Calida.

"SolGen Calida's sense of entitlement and privilege got blown out of proportion to what our laws provide. It is not accidental but deliberate when he draws allowances and financial perks nine times way beyond," ani Akbayan Rep. Tom Villarin.

Kinastigo rin ni Villarin ang umano'y pagsamsam ng pamilya ni Calida sa ilang kontrata mula sa iba't ibang sangay ng gobyerno.

• Calida security firm won multimillion-peso gov't contracts: documents

Base sa nakalap na datos ng ABS-CBN Investigative and Research Group, aabot sa P270 milyon ang halaga ng 14 kontrata na nakuha ng Vigilant Investigative Security Agency Inc kung saan may shares si Calida pati ang asawa at mga anak nito.