PatrolPH

Army reservist balik-kulungan dahil sa di lisensiyadong baril

ABS-CBN News

Posted at May 27 2021 01:43 PM

Balik-kulungan ang isang Army reservist mula New Washington, Aklan matapos muling makuhanan ng hindi lisensiyadong baril ngayong umaga ng Huwebes.

Sa bisa ng warrant, nagsagawa ng search operation ang mga awtoridad sa bahay ng suspek sa Barangay Guinbaliwan, kung saan nakuha ang isang pistol, isang revolver at mga bala.

Ikinasa ang operasyon matapos makatanggap umano ng ulat ang mga awtoridad na palaging may dalang baril ang suspek at minsa'y nagpapaputok sa kanilang lugar.

Dati nang nakulong ang suspek matapos ding mahuli sa pagmamay-ari ng mga hindi lisensiyadong baril pero kalauna'y nakalabas ito.

Hawak ngayon ng New Washington police ang salarin, na sasampahan ng kasong paglabag sa Comprehensive Firearms and Ammunition Regulation Act.

— Ulat ni Rolen Escaniel

Bisitahin ang Patrol.PH para sa iba pang mga balita.