Suspek sa pagsako sa babae sa Muntinlupa timbog

Anjo Bagaoisan, ABS-CBN News

Posted at May 27 2019 11:33 AM | Updated as of May 27 2019 07:40 PM

Watch more in iWant or TFC.tv

MAYNILA (UPDATE) - Arestado ngayong Lunes ang suspek sa pagpatay at paglalagay sa sako noong Sabado sa 22 anyos na assistant supermarket supervisor sa Muntinlupa.

Natunton sa San Pablo, Laguna ang suspek na si Alexander Dimaunahan, 23.

Papunta ang mga pulis sa katabing bayan ng Liliw sa tulong ng ama ni Dimaunahan na nakipagtulungan sa kanila, pero nakasalubong nila ang suspek sa daan.
 
Pinaghinalaan na si Dimaunahan ang gumawa ng krimen matapos mapansin ng kaibigan ng biktima na may mga kalmot ito sa leeg at biglang nawala matapos matagpuan ang bangkay ni Sheva Adare Mae Prementil, 22.

Inamin ng suspek ang paglaslas at paglagay sa sako kay Prementil, na natagpuan nitong Sabado sa bodega ng bahay na tinitirhan ng suspek.

Sinabi ni Dimaunahan sa mga pulis na nagdilim umano ang paningin nito dahil nakainom. Niligawan ng suspek ang dalaga pero nalamang may karelasyon na ang biktima.

Pinaliguan pa umano ng suspek ang biktima bago ilagay sa sako, ayon sa pulisya.

Inaalam naman sa medico legal kung hinalay pa ng suspek ang biktima, pero tinanggi niya ito.

Napag-alaman ng Muntinlupa police na naaresto na si Dimaunahan sa buy-bust operation sa Liliw noong 2016 at naaresto rin noong 2018 sa kasong frustrated homicide.

Kinasuhan ng murder ang suspek.

Bisitahin ang Patrol.PH para sa iba pang mga balita.