Watch more in iWantv or TFC.tv

MAYILA — Nananawagan ang Philippine Federation of the Deaf, Inc. (PFD) na mas bigyan din ng pansin ang mga gaya nila sa pagtugon ng pamahalaan sa gitna ng COVID-19 pandemic.

Ipinanganak si Cristabel Luansing na may hearing disability kaya pagsenyas gamit ang Filipino sign language (FSL) ang paraan niya para makipag-usap. Nagtatrabaho siya ngayon bilang isang guro ng FSL.

Kasama ni Luansing ang dati niyang guro na si Pia Gonzales-Jacinto para ikuwento ang mga hamong kinahaharap nila ngayong may pandemic.

Anila, ngayong panahon ng community quarantine ay mas malaking hamon sa kanila ang pagtuturo na kailangan nilang gawin online.

Kadalasan kasi umano, hindi maganda ang internet connection.

Kaya may pakiusap ang PFD at ang UP Filipino Sign Language Task Force.

"We need technology. How is it gonna work kunwari maralita sila, ang laptop or internet, paano 'yun?" ani Carolyn Dagani, presidente ng PFD.

"Hindi lahat ng mga deaf, may access sa internet. Hindi lang internet access, but the speed is important for us kasi sa wikang senyas, we’re depending on visual. Kung nagfi-freeze nang konti, wala na," ani Liza Martinez ng UP FSL Task Force.

Panawagan din nila, palakihin pa sana ang nakalaang espasyo sa TV screen para sa mga interpreter, lalo na sa mga balita at educational program para sa mga bata at mapalawak ang video at online learning materials para sa mga may hearing disability.

Nang minandato ang pagsuot ng face mask, nahirapan din daw silang mag-lip reading.

Kaya nakaisip ang grupo ni Jacinto na gumawa ng clear face masks para sa deaf community.

"Talagang mahirap lalo na nagre-rely ng communication sa lips para makikita ng mga deaf at the same time protected," ani Gonzales-Jacinto. —Ulat ni Angel Movido, ABS-CBN News