ITOGON, Benguet — Nahanap na nitong Martes ang 3 batang nawala sa bayan na ito noong Lunes.

Sa Facebook nag-post ang mga magulang ng 3 bata para humingi ng tulong. Nawala ang 3 noong Lunes ng hapon habang naglalaro sa Barangay Tuding.

Edad 7 hanggang 8 ang mga bata.

"Di na namin kasi pinansin kasi sanay naman na kami na naglalaro sila doon sa kapitbahay namin tapos around 5 p.m. di pa sila umuuwi sa amin," ayon kay alyas "Rose," ina ng isa sa mga bata.

Nitong alas-12 ng tanghali Martes, natagpuan ang mga bata malapit sa isang creek sa Barangay Gumatdang.

Arestado ang 48 anyos na lalaki na umano'y dumukot sa kanila.

"Base sa revelation ng relatives niya meron daw narinig 'yung mga tao dun na umiiyak na bata sa area doon... Successfully with the help of volunteers and barangay officials na-trace namin 'yung pinagtataguan nung bata at nandun din siya (suspek)," ani Police Maj. Rommel Sawatang, hepe ng Itogon municipal police station.

Rason ng suspek, hindi umano siya binigyan ng sahod ng kaniyang employer kaya niya ito nagawa.

"Nung tinanong namin kung may relationship 'yung mga bata tsaka employer niya wala naman. Wala naman, iba ang parents naman ng mga ito," sabi ni Sawatang.

Isasailalim pa sa kustodiya ng municipal social welfare officer ang mga bata.

Nahaharap ang suspek sa reklamong kidnapping at child abuse. Nasa kustodiya na rin ito ng Itogon police.