MACO - Patay sa pamamaril nitong Huwebes ng gabi ang isang mag-ama sa kanilang bahay sa bayan ng Maco, Davao de Oro, ayon sa pulisya.

Natagpuan ng pulisya sa labas ng bahay sa Purok 1, Barangay Concepcion ang bangkay ni Arman Demecillo Sr., 49 taong gulang.

Nasa kusina naman daw ang bangkay ng anak nitong si Arman Demecillo Jr., 26 taong gulang.

Mga miyembro daw ang dalawa ng Citizen Armed Force Geographical Unit (CAFGU), ayon sa pulisya.

Batay sa inisyal na imbestigasyon ng pulisya, nakaupo lang umano sa silya ang ama na biktima sa labas ng kanilang bahay habang nakaupo rin sa balkonahe ang anak nito.

RELATED VIDEO:

Watch more in iWantv or TFC.tv

Tatlong lalaki umano ang dumaan at huminto sa kanilang pamamahay na nakasuot ng bonnet, itim na t-shirt, at long pants. Lulan daw ang mga ito ng isang motorsiklo.

Sa hindi malinaw na kadahilanan, binaril umano ng isa sa mga suspek ang ama, habang nakatakbo pa hanggang sa kusina ang anak at doon na binaril.

Nagtamo ng tama sa iba't ibang bahagi ng katawan ang dalawang biktima na naging sanhi ng kanilang pagpanaw.

Nagsagawa na ng hot pursuit operation ang pulisya habang inaalam pa ang motibo sa krimen.

- Ulat ni Hernel Tocmo