Alkansiya, ihawan gawa ng 2 construction worker kapalit ng pagkain

Zhander Cayabyab, ABS-CBN News

Posted at Apr 28 2020 11:44 AM | Updated as of Apr 28 2020 07:32 PM

Watch more in iWant or TFC.tv

MAYNILA - Alkansiya at ihawan na mula sa scrap metal ang ginawa at ipinagpapalit ng dalawang construction worker para may makain sa kabila ng lockdown na ipinatutupad sa Metro Manila at ilang lalawigan sa Pilipinas laban sa coronavirus disease (COVID-19).

Kuwento nina Teddy Dayao, 40-anyos, at Ryan Yanga, mula sa napupulot nilang pinagtabasang materyales mula sa construction site ang mga gawang alkansiya at ihawan.

"Ginawan ng paraan, mga scrap-scrap na lang papalit ng ulam para mabuhay lang," sabi ni Dayao. Hindi na rin niya alam kung ano na ang sitwasyon ng pamilyang naiwan sa Dumaguete.
 
"Yung mga pamilya namin sa probinsiya 'di namin alam kung anong nangyayari doon. Si God na lang bahala kung anong mangyayari," sabi ni Dayao.

Ipinagpapalit nila ang mga gawang alkansiya at ihawan sa karne    o delata. Inaalok daw nila ito sa malapit na bahay o tindahan dahil hindi naman nila mailako sa ibang lugar at baka hulihin lang sila.

Wala rin silng natanggap na pera mula sa social amelioration program ng pamahalaan.

Nag-aalala rin si Yanga sa kaniyang mga magulang sa Pampanga dahil wala rin siyang maipadalang pera sa kanila.

"Wala rin akong maipadala, wala rin mautangan. Kaysa magnakaw ka, ito na lang po naisip namin. At least po ito marangal," sabi ni Yanga.

Bisitahin ang Patrol.PH para sa iba pang mga balita.