3 dawit sa gun-for-hire, droga patay sa engkuwentro sa Taguig

ABS-CBN News

Posted at Apr 23 2020 12:33 PM

Patay ang 3 lalaking sinasangkot sa iba't ibang krimen matapos umanong makipagbarilan sa mga pulis sa Taguig City noong Miyerkoles.

Sa ulat ng National Capital Region Police Office (NCRPO), kinilala ang mga suspek bilang sina Adam Chiongbian, Ronaldo Villanueva, at Edward Galleposo.

Ayon sa pulisya, sina Chiongbian at Villanueva ay mga miyembro ng gun-for-hire group habang dawit sa mga insidente ng carnapping at drug peddling si Galleposo.

Dati na rin umanong nadetine si Chiongbian dahil sa kasong may kinalaman sa droga.

Nakatanggap ng impormasyon ang mga pulis ukol sa isang armadong grupo sa Barangay Ibayo Tipas kaya pumunta sila sa lugar para magberipika, ayon sa NCRPO.

Nang dumating ang mga awtoridad, nagtakbuhan umano ang 3 lalaki papasok ng isang bahay kaya hinabol sila ng mga pulis.

Nagsimulang magpaputok ng baril ang mga suspek dahilan para makipagpalitan ng mga putok ang mga pulis, na ikinasawi ng mga lalaki, sabi ng NCRPO.

Nakuha umano sa mga suspek ang isang granada at sari-saring armas.

"The presence of this notorious gang is a threat to the safety and security of the community especially in this trying times," ani NCRPO chief Police Maj. Gen. Debold Sinas.

Patuloy ang imbestigasyon ng mga awtoridad sa nangyari.

Bisitahin ang Patrol.PH para sa iba pang mga balita.