Alert level sa Luzon grid itinaas bunsod ng lindol

ABS-CBN News

Posted at Apr 23 2019 01:10 PM | Updated as of Apr 23 2019 10:17 PM

Watch more in iWant or TFC.tv

Itinaas ang alert level sa Luzon grid matapos tamaan ng magnitude 6.1 na lindol ang ilang probinsiya nitong Lunes, ayon sa National Grid Corporation of the Philippines (NGCP). 

 

Ayon sa advisory sa NGCP Facebook page, nakataas ang red alert mula alas-10 ng umaga hanggang alas-4 ng hapon sa Luzon Grid. 

Samantala ibababa ito sa yellow alert mula alas-4 hanggang alas-10 ng gabi. 

Ang yellow at red alert ay mga hudyat na manipis ang reserba ng kuryente. 

Ayon kay Energy Undersecretary Wimpy Fuentebella, mahigit 1,000 megawatts ang nawala sa mga planta dahil sa lindol pero inaasahang maibabalik na rin ito. 

"Karamihan naman po ng powerplants ay hindi maaapektuhan. So masasabi nating manipis ang ating reserba, hindi po ito makakaapekto sa ating suplay," ani Fuentebella. 

May ilang planta sa may Zambales na naapektuhan ng pagyanig kaya iniinspeksiyon ito, dagdag niya. Sa bayan ng Castillejos sa probinsiya ang epicenter ng pagyanig. 

Naputol noong Lunes ang suplay ng kuryente sa ilang lalawigan gaya ng Pangasinan, La Union, Pampanga, at Bataan matapos ang lindol. 

Agad na naibalik ang suplay sa Pangasinan, Bataan at La Union. Samantala, patuloy pa rin ang operasyon para maibalik ang kuryente sa mga bahagi ng Pampanga na nawalan ng suplay. Isa ang probinsiya sa mga pinakamatinding napinsala ng lindol. 

Noong hapon ng Lunes, niyanig ng magnitude 6.1 na lindol ang Zambales, Pampanga, ilan pang kalapit na lalawigan at Metro Manila. 
 

Bisitahin ang Patrol.PH para sa iba pang mga balita.