2 arestado sa pagbibigay ng swab test kahit di lisensiyado

ABS-CBN News

Posted at Apr 20 2021 06:40 PM | Updated as of Apr 20 2021 08:02 PM

Inaresto ng National Bureau of Investigation ang 2 tao na nagbibigay ng home service na RT-PCR testing kahit hindi sila lisensiyado para rito.

Dalawa ang inaresto ng National Bureau of Investigation dahil sa pagsasagawa ng home service na RT-PCR tests kahit sila hindi lisensiyado.

Nagkasa ng operasyon ang NBI matapos makatanggap ng sumbong mula sa isang pamilyang nagpa-test sa mga suspek. Nagduda raw kasi sila sa paraan ng pagsa-swab at wala ring ibinigay na resibo.

Nahuli ang mga suspek ng mga NBI agent na nagpanggap na magpapa-home service na swab test para sa halagang P3,500 kada test.

Watch more in iWantTFC

Inamin ng isa sa mga suspek na hindi siya lisensiyadong nurse, doktor o medical technologist para mag-swab. Ginawa lang umano niya ito dahil nangangailangan ng pera.

Ayon din sa Department of Health, hindi accredited ang mga suspek para magsagawa ng RT-PCR test.

Lumabas din sa imbestigasyon ng NBI na hindi konektado ang 2 sa laboratoryong idineklara nila.

Kinasuhan ang mga suspek ng estafa at falsification of private documents.

-- Ulat ni Niko Baua, ABS-CBN News

Bisitahin ang Patrol.PH para sa iba pang mga balita.