3 timbog sa paggawa ng fake ID para kumuha ng food coupons sa Pasig

Huli ang 3 residenteng nabistong gumawa ng pekeng ID para kumuha ng food coupons sa Nagpayong, Barangay Pinagbuhatan, Pasig nitong Huwebes.

Hindi na idinetalye ng alkaldeng si Vico Sotto ang pagkakakilanlan ng mga suspek.

Nabatid na nag-imprenta sila ng pekeng ID ng Nagpayong Elementary School.

Namamahagi sa Pasig ng 400 pesos na halaga ng food coupons sa mga estudyante ng pampublikong paaralan at pwedeng ipambili ang coupon sa Pasig Mega Market, mobile palengke, at ilang talipapa.

Sa pagkuha ng food coupon, makakatanggap kahit kaanak lang ng estudyante ang pumunta bitbit ang kanilang school ID.

Pansamantalang itinigil ang pamimigay ng food coupon sa naturang lugar.

-- Ulat ni Zhander Cayabyab, ABS-CBN News