ZAMBOANGA CITY - Nagtamo ng sugat sa likurang bahagi ng ulo ang 11-anyos na magkapatid matapos umano silang hampasin ng bato ng kanilang ama sa lungsod nitong Martes ng umaga.

Ayon sa ina ng mga bata, naglalaba siya malapit sa kanilang bahay nang mangyari ang insidente.

Nagulat na lamang siya nang pag-uwi niya ay nakita niyang duguan ang ulo ng kambal.

Agad niyang isinugod sa ospital ang dalawa upang mapagamot ang mga sugat.

Nasa mabuting kalagayan na ngayon ang mga bata.

Ayon sa ina, nadala sa galit ang ama dahil sobrang likot ng kaniyang mga anak ngunit hindi raw nito sinasadya ang nangyari.

Nakulong ito ng ilang oras sa Police Station 6. Nakalabas ito nang iatras ng ina ang reklamo sa asawa.

Maaaring makulong ang sinumang lalabag sa Anti-Violence Against Women and their Children Act of 2004.